| Herodotus, The Histories (XML Header) [genre: prose] [word count] [lemma count] [Hdt.]. | ||
| <<Hdt. 8.64.1 | Hdt. 8.65.4 (English) | >>Hdt. 8.66.1 |
8.65.2 εἶναι δʼ ἀδαήμονα τῶν ἱρῶν τῶν ἐν Ἐλευσῖνι γινομένων τὸν Δημάρητον , εἰρέσθαί τε αὐτὸν ὅ τι τὸ φθεγγόμενον εἴη τοῦτο . αὐτὸς δὲ εἰπεῖν · “Δημάρητε , οὐκ ἔστι ὅκως οὐ μέγα τι σίνος ἔσται τῇ βασιλέος στρατιῇ · τάδε γὰρ ἀρίδηλα , ἐρήμου ἐούσης τῆς Ἀττικῆς , ὅτι θεῖον τὸ φθεγγόμενον , ἀπʼ Ἐλευσῖνος ἰὸν ἐς τιμωρίην Ἀθηναίοισί τε καὶ τοῖσι συμμάχοισι .
8.65.3 καὶ ἢν μέν γε κατασκήψῃ ἐς τὴν Πελοπόννησον , κίνδυνος αὐτῷ τε βασιλέι καὶ τῇ στρατιῇ τῇ ἐν τῇ ἠπείρῳ ἔσται , ἢν δὲ ἐπὶ τὰς νέας τράπηται τὰς ἐν Σαλαμῖνι , τὸν ναυτικὸν στρατὸν κινδυνεύσει βασιλεὺς ἀποβαλεῖν .
8.65.4 τὴν δὲ ὁρτὴν ταύτην ἄγουσι Ἀθηναῖοι ἀνὰ πάντα ἔτεα τῇ Μητρὶ καὶ τῇ Κούρῃ , καὶ αὐτῶν τε ὁ βουλόμενος καὶ τῶν ἄλλων Ἑλλήνων μυεῖται · καὶ τὴν φωνὴν τῆς ἀκούεις ἐν ταύτῃ τῇ ὁρτῇ ἰακχάζουσι . ” πρὸς ταῦτα εἰπεῖν Δημάρητον · “σίγα τε καὶ μηδενὶ ἄλλῳ τὸν λόγον τοῦτον εἴπῃς ·
8.65.5 ἢν γάρ τοι ἐς βασιλέα ἀνενειχθῇ τὰ ἔπεα ταῦτα , ἀποβαλέεις τὴν κεφαλήν , καὶ σε οὔτε ἐγὼ δυνήσομαι ῥύσασθαι οὔτʼ ἄλλος ἀνθρώπων οὐδὲ εἷς . ἀλλʼ ἔχʼ ἥσυχος , περὶ δὲ στρατιῆς τῆσδε θεοῖσι μελήσει . ”
8.65.6 τὸν μὲν δὴ ταῦτα παραινέειν , ἐκ δὲ τοῦ κονιορτοῦ καὶ τῆς φωνῆς γενέσθαι νέφος καὶ μεταρσιωθὲν φέρεσθαι ἐπὶ Σαλαμῖνος ἐπὶ τὸ στρατόπεδον τὸ τῶν Ἑλλήνων . οὕτω δὴ αὐτοὺς μαθεῖν ὅτι τὸ ναυτικὸν τὸ Ξέρξεω ἀπολέεσθαι μέλλοι . ταῦτα μὲν Δίκαιος ὁ Θεοκύδεος ἔλεγε , Δημαρήτου τε καὶ ἄλλων μαρτύρων καταπτόμενος .
| Herodotus, The Histories (XML Header) [genre: prose] [word count] [lemma count] [Hdt.]. | ||
| <<Hdt. 8.64.1 | Hdt. 8.65.4 (English) | >>Hdt. 8.66.1 |
